ازاي تسوق لشركتك
المرة اللى فاتت اتكلمنا عن ازاي تسوق لشركتك و قولنالكم تجمعوا وتكتبوا علي ورق كل الموارد اللى معاكم واكتبوا كل حاجة تعرفوها عن البيزنس عشان نبدأ نوظقها صح فى خطه تسويق مظبوطة .
بس عشان الناس اللى مجهزتش الحاجات دي . هنساعدكم ونعرفكم ايه بالظبط اللى محتاجينه وايه اللى هيساعدنا نبني خطه تسويق مظبوطة نضمن بيها نجاح شركتنا
1.
اول حاجة ادرس السوق كويس و شوف احتياجاته قبل ما تنزل منتجك او خدمتك .. يعنى المنتج اللى هيلبى فعلا احتياجات الناس و يشبعها .. ساعتها هتعرف تسوقلو كويس و بسهوله او اعمل تطوير علي منتج موجود .. ضيف حاجة جديدة للمنتج المهروس دا عشان الناس تشوفك مختلف.
ادرس المنافسين ارسم مربع الـ SWOT واكتب نقاط القوه والضعف عند كل منافس والفرص والتهديدات ليك وللمنافسين .
2.
درست السوق والمنافسين ؟؟ نبدأ بقي نحدد الشريحة اللى هنشتغل عليها ” وعاوزين نقولكم ان حاليا اكتر 70 % من السلع الاستهلاكية بقيت بتستهدف البنات والستات فى تسويق منتجاتهم ودا لانهم متخذين القرار 😀 .
اعرف الشريحة اللى هنشتغل عليها واعرف سلوكهم .. اعرف بيحبوا ايه وبيكرهوا ايه ؟؟ يعني مثلا لو بتستهدف شريحة الشباب كلمهم بطريقه بسيطة وسلسه ادخلهم بالتريند اللى متابعينه حسسهم انك منتجك شبابي زيهم .
3.
دلوقتي لازم تحدد بقي هتروح للسوق والمستهلكين فين ؟؟؟ هتعرفهم بمنتجك ازاي ؟؟ اكيد بعد مدرست المنافسين عرفت هما بيهتموا يظهرو منتجاتهم وخدماتهم فين ؟؟ بس مش دا الاهم … الاهم انك تعرف الفئه اللى بتستهدفها موجودين فين ؟؟
علي فيس بوك ؟؟ ولا علي التليفزيون ولا بيركبوا عربيات فهتشتغل راديو ؟؟
انت اللى هتحدد بناءا علي دراستك للسوق … فادرس السوق صح عشان متدفعش فلوس فى طريقة متبقاش مجدية معاك .
4.
حدد بقي التارجيت بتاعك .. وزود عليه شوية 😀
انت محتاج تبيع منتجك فى الشهر لكام واحد ؟؟؟ طيب محتاج كام حد يشتري الخدمه بتاعتك عشان ضمن خطتك الماليه تكون كسبان ؟؟؟ حدد بقي الرقم دا كويس اوي وزود علي التارجيت دا شوية عشان تضمن وصولك له .
لازم تتعود تشتغل بتارجيت وبرقم عشان تقدر تقيس نجاحك او فشلك
5.
نبدأ بقي نجهز ورقنا عشان نعرف الميزانيه بناءا علي :
عرفنا التارجيت اللى محتاجين نوصله … وعرفنا الشريحة اللى بنستهدفها موجودة فين .. طيب التسويق بقي هيكلفنا كام من خلال القنوات التسويقية الفعاله معانا ؟؟؟ لو علي فيس بوك فلازم تبقي عارف متوسط الكليك او الظهور للبيزنس بتاعك بكام ؟؟؟ ولو تليفزيون بردو تجيب اسعار العرض علي القنوات اللى بتستهدف شريحتك .
لما هنحدد كل الخطوات اللى فاتت هنكون وصلنا لمرحله كويسة تساعدنا نبني خطه تسويقية مظبوطة
